Zion Tangko Hawm 7 Na

ZION TANGKO HAWM 7 NA
A sung aom thute;
Editorial Laikhung pan
November Kha sung ZPC
NATO THU TOMLAKNA
JERUSALEM AH JESU
KHASIA PAH SAM KEN
SINGLAMTEH TUNG PAN KAMMAL 7
　
Editorial Laikung pan

 

The Full Gospel to the Whole World by the Church
Zion Tangko hawm a 7 veina ciangah hong tun Topa a min thang semsem ta hen.
Jesu sungah, Jesu ading, Jesu tawh, ih nuntakna, ih lametna, ih nopsakna, ih lawpna, ih ki ngakna, ih khamuanna, ih itna, leh ih vai khempeuh ih koih ding hong deih hi.
Nipi hong tun ding ki ngaklah mahmah in, home cell kikhop, leh Saturday thunget khop hun hong tun ding kilawp mahmah hi. Ahang taktak pen Jesu a gualzawhna mun hi a, ih dahna ih lungkhamna, ih launa teng a ventheihna mun ahi hi (Fil.4:4-7). Topa tawh kikholhkhopna ah amah hong innteek den hi.
Ei thu-um a piangthakte gualzawhna lian penpen in "lungdam tawntung theihna" ahi hi. A lungdam tawntungte Satan in a zo theikei hi. "Topa sung lungdamna in note (ka) thahatna hi" (Neh.8:10).
Na hihna bangbang in lungdam in, apiang na khat peuhpeuh hangin lungdam in, sihna, damna, natna, zawnna, kamphatna, kamsiatna, hihte khempeuh in ih Topa Jesu hong itna tawh hong khenkham zolo ding hi (Rom. 8:37-39).
Lungdamna tawh a gualzote ih hi hi. Tua lungdamna pen Jesu’ Khasiangtho hangbek in ki ngahthei hi. Khasiangtho neilote Khazih mi ahikei hi (Rom.8:9). Khazih mite bek in leitung a zozo hi (Rom.8:1-17).
　
November Kha Sung ZPC

• Nov 1st ni in member thak 4 pawlpi ah ki ap hi.
• Nov 1st ni in Motor thak sitset 2015 model nih apna kinei hi.
• Nov 1st ni in Piano hoih mahmah zong apna kinei hi.
• Nov 6th ni in Pa Nang S Kap te innkuan in innthak a leina uh luahlum ta in, pawlpi siate leh upate thungetna hong sam uh a, pawlpi sungpan inn neithak a ki behlap ni in kiciamteh hi.
• Nov 6th ni in Tg Gin Sian Sang, upmawhloh pi in a tenna Kawlpi pan in hong nusia in, Pa Sian Siam leh Sis Hau S Cingte laizom ahihna tawh pawlpi sungah dahna lianpi kithuak hi ci in ki ciamteh hi.
• Nov 7th ni in, Biakinn thak siansuahna kinei in Pa Thang S Dam ten kel sisan hong tak uh a, hih ni pan kipan in kigin ni thunget kizang suak ta hi.
• Nov 18th ni in, ZPC kum nga cinna Calendar 2016 kihawm khia ziahziah ta hi.
• Nov 10, 11,17,18,24,25 sung tawntung Pa Thang Z tungte inn zangin a hunzui gupkhiatna thu kisin a, tha kingah mahmah hi.
• Nov 29th ni in Biakinn thak lutna kinei theita in, Rev. Michael Lian te innkuan in Fried Rice lim mahmah tawh Pawlpi anvakna hong nei uh hi. Tuni in Jesu min tawh tuiphumna hong la li pha in, minister li leh member li kihel thei in, a vekpi gawm 12 kipha hi. Nov 15 ni in khat kiphum in tukha 5 kiphumsuak hi.

NORTH ATLANTIC TREATY ORGANIZATION (NATO) THU TOMLAKNA

 

Hong kipatna: April 9, 29149 kum in Belgium, Canada, Denmark, France, Iceland, Italy, Luxembour, Nether Lands, Norway, Portugal, UK, US gam 12 te in thukimna bawl in NATO cih hong phuan khia uh a, Founding Members gamte ahi uh hi.
Ngimna: Atlantic saklam gam kipawlna hi a, gam khatpeuh in hih NATO member khatpeuh gal in a do zenzen leh kido pih khawm ding cih thukimna ahi hi.
Member khang: (1) Feb 18, 1952 kum in Greece leh Turkey lut uh hi. (2) May 6, 1955 kum in Germany gam lut hi. (3) May 30, 1982 kum in Spain lut leuleu hi. (4) March 12, 1999 kum in Czech Republic, Hung-ary leh Poland te lutbeh hi. (5) 05/29 2004 kum in Bulgaria, Estonia, Latvia, Lithuania, Romania, Slovakia, Slovenia gam 7 lut beh hi. (6) April 1, 2009 kum in Albania leh Croatia lut beh leuleu a, NATO member pen gam 28 a phak laitak ahi hi.

 

Secretaries General
1. Term khat pen kum guk hi in, anuai ah ensuk ni
2. Lord Ismay, UK 4.4.57-5.16.57
3. Paul-Henri Spaak, Belgium 5.16.57-4.21.61
4. Dirk Stikker, Netherlands, 4.21.61-8.1.64
5. Manlio Brosio, Italy, 8.1.64-10.71
6. Joseph Luns, Netherlands, 10.1.71-6.25.84
7. Lord Carrington, UK, 6.25.84-7.1.88
Manfred Worner, Germany, 7.1.88-8.13.94
Sergio Balanzino, Italy, 8.13.94-10.20.95
8. Willy Claes, Belgium, 10. 17.94-10.20.95
Sergio Balanzino, Italy, 10.20.95-12.5.99
9. Javier Solana, Spain, 12.5.95-10.6.99
10. Lord Robertson, UK, 10.14.99-12.17.2003
Alessandro Minuto-Rizzo, Italy, 12.17.2003-01.1.2004
11. Jaap de Hoop Scheffer, Nether-lands, 01.1.2004-08.12009
12. Anders Fogh Rasmussen, Denmark, 08.1.2009-09.30.2014
13. Jens Stoltenberg, Norway, 10.1. 2014-present
Makaipi zawdeuh pen General Secretary cih leh Deputy General Secretary kici hi. Tulian laitak Deputy General Secretary pen US gam pan hi in, Alexander Vershbow 2012– a sep laitak ahi hi.
Gentehna in, Russia in Turkey NATO member gam khat ahi gal hong do zenzen leh NATO gam khempeuh tawh a kido uh hong suak mai ding a, ki patau mahmah tek hi.

 

 

JERUSALEM KHUAPI AH JESU

 

Israelte khuapi siangtho: David khuapi zong kici a, Pasian in Israel minam adingin a siang tho khuapi dingin a ciaptehna hang ahi hi.
Khristiante ading khuapi siang tho: Jesu si, kivui, thokik, a vankahna khuapi ahih ban ah Pawlpi dincilna khuapi hi in, a nihveina Jesu hong paikikna ding khuapi ahihna hang ahi hi.
Muslimte adingin khuapi siang tho: a lian pen leh a nunung pen Muhammad a sihzawh ciangin a vankahna khuapi dingin ngaihsun uh ahihman in khuapi siangtho dingin ciam teh uh hi.
Jesu: Jesu tawh kisai in Jerusalem khua ah a kalsuanna khempeuh ih sut theih bangbangin sut suk ding hanga, a sim khempeuh adingin thupha hong hi ta hen. Amen.

 

1. A nu leh pa in Jesu a siansuah na (nau-apna) khua ahi hi (Lk.2:1).
2. Kum 12 a phak laitak in a nu leh pa ten Paisan pawi simpih uh hi (Lk.2:41-50).
3. A khat veina Biak-innpi sian suah hi (Jn.2:13-17).
4. Judah ulian Nicodemus tawh a holimna khua hi (Jn.3:1-16).
5. Kum 38 ciluang natna a dam sakna khua hi (Jn.5:8).
6. Bukpawi ah hangsan takin thu gen hi (Jn.7:10-39).
7. Numei paktat khat a mawhna maisak hi (Jn.8:33-59).
8. Dawimangpa leh a nungzuite cih thuhilhna nei hi (Jn.8:33-59).
9. Pianpih mittaw khat damsak hi (Jn.9:7).
10. Tuucing hoih cih sermon pia hi (Jn.10:1-18).
11. Na Kumpipa uh hong pai hi cih a tangtunna khua hi (Jn.12:12-15).
12. Ahut theikung samsia hi (Jn.Mt.21:19).
13. Farisai leh Sadducee te mawhsakna thugen (Mt.23:1-36).
14. Mailam thupiang ding genkholhna nei hi (Mt.23:37-39).
15. Inndei tungnung ah nasepna tuamtuam leh thuhilhna nei (Jn.13-14 chs).
16. Lenggui leh a hiangte thuhilhna nei hi (Jn.15-16 chs).
17. Siampi nasem dan in thu ngen hi (Jn.17).
18. Gethsemane ah matna thuak hi (Mt.27:26).
19. Galkap mangpa bil kisatkhia pen thuahsak kik hi (Lk.22:51).
20. Si dingin thu kikhen (Mt.27:26).
21. Singlamteh tungah khaina thuak (Mt.27:27-50).
22. Si, kivui, thokik (Mt.27:51-28:10
23. A thawhkik zawh a masa pen upper room ah (Lk.24:36-43; Jn.20:19-).
24. A thawhkik zawh a nih veina upper room hawhna (Jn.20:24).
25. Upper room a thumvei hawhna leh a tawpna (Mk.16:14-18; Lk.24:44-49).
26. Vankahna (Sawl.1:4-11).
27. Jesu in hihkhua pan kumpi sem ding hi (Zekh.14:4-9).

Sawltak alian 2, Pawlpi pen Pentecost ni in Jerusalem khua ah hong kiphut in, misiangtho laktohna hun ah pawlpi beita ding hi.
　

KHIASIA PAH SAM KEN

Hong ki gensiat leh……..Hong kiphawk den hizaw hi

Hong ki kawk khak leh…...Hoih hong kisa sim gige cihna

Hong kihuat leh…..Hong ki englua hizaw

Hong ki langpan leh…...Hong ki dem zolo cihna

Hong ki et-cik leh…..Midik na hihna hang hizaw

Hong ki hazat leh….Lawhcing mi khat nahihna hang hi

Hong ki muhdah leh…..A daupai zaw na hihna hang hi

Hong ki zahpih leh...Tellua hong sa uh cihna hi

Hong ki deihgawh leh...Neihzawk khat nei cihna

Hong ki dembawl leh...Na dinmun sangzaw cihna

Hong kimawhsak leh...Hong paakta tam cihna

Hong kihawmthawh leh...Hong telcian nailo cihna

Hong ki telkhialh leh...Na tampi semthei na hihna hang hi

Hong ki suktuah leh...Kilempih hau hong kisa cihna

Hong ki thuhilh leh...Hong kideihsak man hizaw hi

Hong ki phat den leh...Picing hong kisa nailo cihna

Hong ngek-ho den leh...khangham lungtang kisam hong sa

Hong thu don nawnkei leh...hong muang mahmah ta cihna

Siatna pelh in la hoihna behlap in mi thupi na suak ding hi

 

Singlamteh tungpan Kammal 7
Pa aw, amaute in bang hih cih theilo uh ahih man un amawhna uh na maisak in (Lk.23:34).
Ken, aman takpi kong gen in ah, tuni in Paradise ah ih omkhawm hi (Lk.23:43).
Numei aw, tua lai ah na tapa om hi, na nu hiah om hi (Jn.19:26,27).
Ka Pasian, ka Pasian, bang ding in hong taisan na hi hiam (Mt.27:46).
Ka dangtaak hi (Jn.19:28).
A zozo hi (Jn.19:30).
Pa aw, na khut sungah ka kha kong ap hi (Lk.23:46).