Zion Tangko Hawm 6 Na

The Full Gospel to the Whole World by the Church

The Full Gospel to the Whole World
UPNA NEI MI IH CIHTE

• Amawhna a kisikkik mi hi ding hi...
• Thuman thutak ahi Jesu ahihna bangin a pom/asang mi hi ding hi...
• Jesu in Satan tungah thukhenna tawh gualzawhna lakkhin zo hi cih athei mi ahi hi…
• AD 30 hun pawl a, Pentecost Day ni in Khasiangtho hong kibua in Pawlpi hong ding hi cih upna neimi hi ding hi.
• Sawltakte upna, thuhilhna, zuihna, lametna banglian anei mi hi ding…
• Jn. 16:8-12; Mk.16:15-17; Act. 1:8; 2:38-39; Gal.1:7,9; Efe.4:4-5; Mt.16:18-19.

　
A sunga om thute
Editorial Laikhung pan
Sermon Siam
LST sunga Vision munte
Tatkhiatna thu
Sam Walton Tangthu (Walmart & Sam’s Club)

 

Editor Laikung pan

Zion Tangko hawm gukna ciang ah hong tun Topa minthang semsem ta hen.
Biakpiakna ah bang teng tawh bia cih sangin bang ci biak cih Topa in ih lungsim hong encik zaw hi (Jn.4:23-24).
Na siamna sangin na lungsim tawng tawh na biakna hong enzaw Topa ahi hi. Siamna thupi masa lo a, thupi simlohna lauhhuai zawkan lai hi. Thupit ngaihsut ding hi a, ih biak Pasian aliat mahmah na thu ngaihsut ding ahi hi. Alian mahmah Pasian tungah biakna apia ka hi hi cih lungsim tawh biakding ahi hi. Tua hileh kei nangawn in biakna piakha cih kiphawk hileng, lungdam loh a phamawh ding ahi hi.
Biakna sungah phatna zong kihel hi. Phatna cih ciangin, ih siamna khempeuh, ih hihtheihna khem peuh tawh phat ding ahi hi. Ih siamlohna tawh phat ding hilo a, ih siamna pen tawh phat ding ahi hi. Ka siamloh hang phamawhkei cih ding hilo a, ka siamna bang bang tawh Topa ka pahtawi ding hi cih ding hizaw hi.
Biakpiakna ah piakkhiatna zong kihel hi. A hoih pen, a limci pen ih piakna in, ih biakpa tungah ih lungsim khempeuh ih lahkhiatna ahi hi. A tam theithei piakna tung ah Pasian lungkim masa lo in, phatlna, akim, a kicing, guksim kihel lo thuman tawh piakna ah Pasian in ih biakna hong sang hi.
　
LAISIANGTHO SUNG A VISION OMZIA TE

 

Jacob pen a vision tungtawn in Egypt ah paiding Topa in sawl hi ( Pian. 46:2)

David in a vision tungtawn in Pasian thukhenna danding te mu (1 Khang. 21:16)

Isaiah in a vision tungtawn in Pasian’ sianthona mu (Is. 6:1-8)

Daniel in Gentile kumpite hong khantoh zia ding a vision ah mu (Dan. 7,8 chs)

Daniel in Khazih vangliatna ding a vision tungtawn in mukhol (Dan. 10:5-10)

Daniel in Alexander the Great (Greek galkapmangpa) hong khankhiat dan ding leh a kumpi gam a beizia ding a vision tungtawn in mukhol (Dan. 8)

Ezekiel in Israel angei abat kikzia ding a vision tungtawn in mukhol (37)

Siampi Ananias in Saul tung ah a nasep zia ding a vision tungtawn in mukhol hi (Sawl. 9:10)

Topa in Peter a sawlna thu Kornelias in a vision ah na mukhol hi (Sawl. 10:1-3)

Kornelias inn ah a paidan ding Piter vision ah Topa in ho hi (Sawl. 10:10-116).

Macedonia gam ah thuhilh ding in Paul vision ah Topa in ho (Sawl. 16:9).

Ahangsan theihna ding in Topa in a vision sungah Paul thapia hi (Sawl. 18:9)

Paul in Jerusalem ah hangsanna a neih mahbang in Rome khuapi ah zong a laulohna ding in Topa in a vision tungtawn in gen hi (Sawl. 23:11)

Paul in Jesu vangliatna a vision pan in mu a, van thuap thumna dong ah kah to hi ci hi (2 Kor. 12:1-4)

It Zawhang in, a vision tungtawn in Mangmuhna Bu hong gelhkhia hi.

　

SERMON SIAM

1. Khazih in kha mangthangte a veina leh a tuute a itna thu tawh a helkhawm thei dente ahi hi.
2. Thulu tawh kituaklo thugen tehna leh thu lianlua thudang a hello te ahi hi.
3. Sermon siamna in kha mang-thangte manlo hi cih a tel mi ahi hi.
4. Sermon siamlohna in zong mipi kha-an vaklo hi cih a tel mi ahi hi.
5. A thulu tawh kilehbulh ciamnuih nainawng leh thudang ahel lo mi ahi hi.
6. A khupna kuan ah kammal picing or thugil tawh a khum thei mi ahi hi.
7. Mi sermon hun ah thu ngaih dan a siam mi bek hilo in thuciapteh dan a siam mi ahi hi.
8. A thugen ding thu a tel mahmah mi hi dinga, upmawh thu a genlo mi hi ding hi.
9. A siamloh nam tawh a thuah khawm lo mi hi ding hi (gtn, lasiamlo mi ahih leh solo, duet sakloh zawk ding ahi hi).
10. Mi kampauna, gamtatna, leh omzia te zahpihna tawh aneu bawlsak mi hilo ding hi.
11. Mi kamsiatna namte a selpho lo mi ahi hi.
12. Thungai mite tawh lungsim ki dolo mi ahi hi (gtn, thungen ngeilo maw, lawmlawm, thungai ding in hong pailote ong kikhawm nawnkei un, cih dante kidop huai).
13. Thungai mite pawlpi khat bangin itna leh veina tawh a musiamte ahi hi (pawlpi dang pan omthei hi, ahizongin, ih thugen ong ngaikhawm mipite ahihlam phawk huai hi.
14. Khasiangtho in a thugenna tungtawnin mipi tungah na sem ding hi cih upna tawh thu-ngen in a ki-ap mi hi ding hi.
　

SINGLAMTEH TUNGAH PASIAN-MIHING SI, TATKHIATNA SISAN, THUCIAM THAK A KIPSAK SISAN
　
Pasian si theilo: Pasian in Kha ahi hi (Jn.4:24). Jesu pen Khasiangtho ahi hi (Mt.1:20; Lk.1: 35). Singlamteh tungah a si pen Pasian ahikei hi, tua hi leh bangpen si hi ding hiam? Singlamteh tungah Pasian-mihing (God-man) si hi. A kimutheilo leh a sitheilo Pasian pen mawhneite hong tatkhiat theihna dingin mihing taksa tawh numei sung pan suak in mihing hihna hong silh hi (Fil.2:6,7; Jn.1:14). Mihing pumpi khat sung ah mihing hihna leh Pasian hihna nam nih (two natures: human nature and divine nature) hong nei a, hih pen mihing bangin hong suahna thu bek ah ahi hi (only in his incarnation). Mihing in hong suahma in mihing taksa a nei kei hi (tawntung tapa hilo). Ama sunga om a sitheilo Kha (God is Spirit, Jn 4:24) pen Pasian ahihna taktak ahi hi. A sunga om pen Tawntung Pa ahi hi (Everlasting Father, Isa.9:6). Tua ahih manin ama sung ah a om Pasian Kha pen aman Pa ci a, Pasian zong ci hi. Mihing mitmuh theih in a om taksa pumpi pen a sithei pumpi, sisan nei, khua ul nei mihing ahi hi. Mihing pumpi cih hangin mihing mawhna khat zong neilo hi, bang hang hiam cih leh Khasiangtho gaisak hi in, pasal leh numei kizopna pan in a piang ahi kei hi. A sunga Kha a pai khiat kei leh amah a si ngeikei ding hi. Bang hang hiam cih leh amah Tapa bangin hong pai ahi hi , "Pasian Tapa kici ding hi" (Lk.1:35). Singlamteh tungah a si pen Pasian hilo in, a mihing hihna si ahi hi, ama sungpan a Pasian hihna a pusuak ciangin "Ka Pasian, Ka Pasian bang ding in hong taisan na hi hiam" ci hi (Mt.27:46). Ama sungpan a Kha (Divine nature) a paikhiat ciangin sithei pan cihna ahi hi. Pasian a hihna ahih leh si peuhmah lo in leisung ah a taksa a kiphum nithum sungin (Hell gam ah vapai a, mawhsakna thu va gen hi 1Pit.3:18-19; anihna ah gupngah khate kikholna ah zong vapai a, van gam lutpih hi (Efe.4:8-10). A nithum ni in a taksa pumpi pen sithei nawnlo pumpi leh gualzawhna tawh hong thokik hi (Kor.15 ch). A sih hun sung bek a Pasian hihna leh mihing hihna kikhen hi a, tua pen tatkhiatna dingin hong sihna zong kici hi. A singei, tu leh a tawn tung in a nungta Pasian pen Jesu ahi hi (Mang. 1:17-18). Pasian khat bek hi a, amin Jesu cih tawh hong pai in, gumpa min a hihna ahi hi (Mt.1:21; Zech 14:9; Sawl.4:12). Tua Jesu min ki pahtawi in, tua min sungah mi khempeuh hong kaikhawm hi ("a people for his name" Sawl.15:14-15; Fil.2:10 "at the name of Jesus")
Jesu sisan kua tungah ap hi ding hiam? Kum khat in khat vei bek a kilut thei siangtho pen mun ah siampi lian pen kumsim in ama sisan ahilo gan sisan tawh a lut bang hilo in, ama sisan tawh khat vei bek biakpiakna hong zang Jesu sisan in a tawntung biakna dingin a kimang ahi hi (Heb.9-10 chs). Midang tungah ama sisan a valui hilo in, thuman Pasian ahihna sungah ama sisan mah mah a lui hi a, thuciam sisan kici hi (1Kor.11:25; Lk.22:20; Pai.6:6). Thukham lui a beisakna ding leh a thak a kipsakna thu khun thak sisan ahi hi. Pasian lam tawh kisai thuciam thak a kipsakna sisan hi a, mihing lam adingin tatkhiatna sisan hi in, mimawhte hangin hong si ahi hi. Tua hangin, amah a thatte pen Jews leh Rome galkapte hizawlo in, mawhnei mi khempeuh mawhna in amah that ahi hi (Rom.6:23). Adam khangpan ih luahsuk mawhna pen ama sisan in hong tankhia in, amah Pasian in ih sanzawhloh mawhna pen Jesu min tawh tuiphumna in maisak thei bek hi (Sawl.2:36-39; Jn.8:24).
　
SAM WALTON TANGTHU TOM ( March 29, 1918-April 5, 1992)

 

Suahna: Kingfisher, OK khua ah March 29, 1918 ni in suak hi.
Tenna khuate: Nuntakna haksatna hangin Oklahoma, Florida, Missouri, Iowa, Utah, Arkansas, State guk bang ah na kituah kawikawi uh hi.
Pilna leh nasep: 8th grade Shelbina, MO ah a sin laitak in Eagle Scout pahtawina (bangkim ah siampen) ngah a, hih pahtawina a ngah ama hunciang ah a naupang pen pen in kiciamteh hi. A nuntakna uh haksalua ahih man in Columbia MO ah kituah leuleu uh a, tua mun ah a sangkah kawmkawm in bawngnawi suk in, amahmah in zuak hi. A sawt lo in Newspapers zuak kisin leuleu in, magazine te zuak kawikawi in tua bang tawh a sangkahna ding leh a innkuan nuntakna ding uh a hanciam mahmah khat ahi hi. Bangkim a sem thei/nuam cih a sangah pahtawina kipia hi.
High School a man khit ciangin University of Missouri ah College kah a, hih hunsungin zong nasep nam- kim sem veve hi ( hotel ah kuangsawp, anpia, anhuan, etc). 1940 kum in BA (Economic tawh man a, tua pan in J.C. Penney ah management tentan pia in Des Moines, Iowa ah kha 18 sung sem a, kha khat $17 thalawh hi. Tua pan in galpi nihna sung galkap lut hi. A kha sum ngah zahzah khol sitset in, captain ciang tung hi. 1945 kum in galkap tawp in kum 26 phapan hi. Galkap a lutsungin a sumkhol $5000 behlap in kumpi tungah $ 20,000 leitawi in, sik namkim zuakna sai Ben Franklin store hong lei in kum 17 siknam bek zuak hi. 1962 kumciangin, van kiman zuakna ci in ama min atap sak Walmart cih sai khat July 2, 1962 kum Rogers, Arkansas khuaneu khat pan pankhia a, siknam bek hinawnlo in, van nam
namkim zuakna hong pankhia hi. Kumpi theihpihna (incorporated) 1969 kum in ngahta hi.
A lawhcinna: 1945 a kipatkum in $5,000+20,00=$25,000 tawh hi a, hih kumbei in a $105,000 met hi ($1.38 million 2015 tawh kikim). 1946 kumciangin $175,000 man met to hi. Kum nga sungin $250, 000 bang kholthei ta hi. Hih store mun pen neu luata ahih manin a mundang ah suan hi, tu in museum in kizang hi. 1969 pan 1981 kum ciang pen a logo WAL-MART pen font style 1981 pan 1992 kum in laih hi. 1992 pan in hyphen zang nawnlo in aksi Wal Mart ki zang hi. 1973 kum in Tennessee state ah kipan theita hi.
Walmart International: January 2014 report ah, Gam 26, mun 6,337, nasem 800,000 US kihello ahi hi. Worldwide nasem bekbek pen 2.2 million pha hi.
2010 kum sung bekbek in $100 billions van kizuak khia hi hih pen 24.7 percent's bek hilai hi.
Warehouse pan Sam’s Club: 1991 kum in Warehouse neite in zuak uh a, Sam Walton in lei hi. Warhouse pan in Sam’s Club min tawh laih a, Sam Walton min pua mah ahi hi. Walmart behlapna ahi hi.
Khangthumna: Sam Walton pan in a khangthumna ciang dong ah amau innkuan neihsa (owner) mart ahi hi. Bawngnawi suk leh kuangsawp nuntakna pan in a neih zah khempeuh Dollar $5,000 tawh a kipat pen 1982 pan 1988 ciang US mihaupen minphatna ngah in, Sam Walton sihkum 1992 pan Bilgate in amasa pen mihau pen cih hong ngah hi. Ih sepna khat peuhah citak in, ih innkuan, ih pawlpi adingin citak in Pasian tungtah thuman leng Pasian in hong laamsang theilua hi.


Zion Tangko
Zomi Pentecostal Church
Nashville TN USA